Ketuvim Netzarim:

Shimon Kefa Alef a apak / 1 Peter Perek 1

1, 2, 3, 4, 5

Go to Index Page

Kefa-Alef 1:1 פטרוס שליח ישוע המשיח אל־תושבי תפוצות פנטוס גלטיא קפודקיא אסיא וביתיניא׃

Kefa-Alef 1:2 הנבחרים מדעת אלהים האב מקדם בקדוש הרוח אל־משמעת ישוע המשיח ואל־הזית דמו חסד ושלום למכביר יהיו לכם׃

Kefa-Alef 1:3 ברוך האלהים אבי אדנינו ישוע המשיח אשר כרב רחמיו חזר וילד אתנו לתקוה חיה בהקמת ישוע המשיח מעם המתים׃

Kefa-Alef 1:4 לנחלה אשר לא תשחת ולא תגאל ולא תבל הצפונה לכם בשמים׃

Kefa-Alef 1:5 השמורים בעז אלהים על־יד האמונה לתשועה העתידה להגלות לעת־קץ׃

Kefa-Alef 1:6 אשר בה תגילו אתם המתעצבים עתה מעט לפי הצרך במסת שנות׃

Kefa-Alef 1:7 למען תמצא אמונתכם המזקקה יקרה הרבה מן־הזהב האבד הצרוף באש לתהלה ולכבוד ולתפארת בהתגלות ישוע המשיח׃

Kefa-Alef 1:8 אשר אהבתם ולא ראיתם ואשר תאמינו בו עתה ואינכם ראים אתו ובכן תגילו בשמחה מפארה עצמה מספר׃

Kefa-Alef 1:9 לשאת עקב אמונתכם תשועה לנפשתיכם׃

Kefa-Alef 1:10 את התשועה אשר עליה חקרו ודרשו הנביאים הנבאים על־החסד הצפון לכם׃

Kefa-Alef 1:11 לחקר לדעת מה־זו ואי־זו העת אשר הודיעה רוח המשיח אשר בקרבם בהגידו מראש את ענויי המשיח ואת־הגדלות אשר אחריהם׃

Kefa-Alef 1:12 ונגלה להם אשר לא לנפשם כי אם־לנו היו משמשים בדברים ההם אשר הגד לכם עתה על־פי המבשרים אתכם ברוח הקדש השלוח משמים דברים אשר מלאכי אלהים חמדו להשקיף אל־תוכם׃

Kefa-Alef 1:13 לכן חגרו מתני שכלכם התעוררו וקוו בכל־נפשכם לחסד אשר יבואכם בהתגלות ישוע המשיח׃

Kefa-Alef 1:14 כבני משמעת אל־תתנהגו כתאות אשר התאויתם בעוד היותכם בבלי־דעת׃

Kefa-Alef 1:15 כי אם־היו קדשים בכל־דרכיכם כאשר הקרא אתכם קדוש הוא׃

Kefa-Alef 1:16 כי על־כן כתוב והייתם קדשים כי קדוש אני׃

Kefa-Alef 1:17 ואם־תקראו אב לאלהים השפט בבלי משא פנים כמעללי איש ואיש התהלכו־נא ביראה בימי מגוריכם׃

Kefa-Alef 1:18 מפני שידעים אתם כי לא־בדבר נפסד לא בכסף ולא בזהב נפדיתם מדרך הבלכם אשר הנחלתם מאת אבותיכם׃

Kefa-Alef 1:19 כי אם־בדם יקר של־שה תמים שאין־בו מום בדם המשיח׃

Kefa-Alef 1:20 הנודע מראש לפני מוסדות תבל ונגלה באחרית הימים למענכם׃

Kefa-Alef 1:21 המאמינים על־פיו באלהים אשר הקים אתו מעם המתים ויתן־לו כבוד למען היות אמונתכם תקוה לאלהים׃

Kefa-Alef 1:22 זכו את־נפשתיכם על־ידי הרוח בשמעכם בקול האמת לאחוה שאין בה חנפה ואהבתם איש את־רעהו אהבה עזה בלב טהור׃

Kefa-Alef 1:23 כנולדים שנית לא מזרע נשחת כי אם־מזרע לא ישחת במאמר של־אלהים החי והקים לעולם׃

Kefa-Alef 1:24 כי כל־בשר חציר וכל־כבוד איש כציץ השדה׃

Kefa-Alef 1:25 יבש חציר נבל ציץ ודבר יהוה יקום לעולם והוא הדבר אשר בשר לכם׃

---

1, 2, 3, 4, 5

Go to Index Page

Acts 2:9, Acts 6:9, Acts 16:6, Acts 19:10, Acts 19:22, Acts 19:26, Acts 19:27, Acts 20:16, Acts 20:18, Acts 21:27, Acts 24:18, Acts 27:2, Rom 16:5, 1 Cor 16:19, 2 Cor 1:8, 2 Tim 1:15, 1 Pet 1:1, Rev 1:4